2009年3月15日 星期日

[報導] 盧廣仲處男唱 星光閃閃


廣仲身穿「Sorry, I'm Late」t-shirt、短褲出場,無懼寒冷天氣。


Eason睇得好投入,全晚又唱又跳。


廣仲當晚「Yeah」足45次,連fans都學佢「Yeah」埋一份。


廣仲著住條閃褲唱〈Loving You〉,吸引全場目光。


雖然冇請到表現嘉賓,但廣仲將第1次彈電結他送俾香港fans,點計都係大家賺咗。

廣仲之前講過會苦練鋼琴,果然冇呃大家,彈得好好聽。

以冬茹頭、短褲作為註冊商標嘅盧廣仲,琴日(14/3)終於嚟到香港Star Hall舉行個人演唱會,全場爆滿外,更吸引多位星級fans,如歌神陳奕迅(Eason)、方大同、薛凱琪、at 17、葛文輝等10多位藝人棒場,可謂星光熠熠。

當晚廣仲開場一唱〈我愛你〉,大家即時high到企起身,連佢都覺得不可思議:「想不到大家這麼早就站起來,好呀!」不過,佢好體貼,唱慢歌嗰陣勸大家先坐低休息下。適逢係白色情人節開唱,佢好感激大家帶埋情人嚟睇show,重笑說自己冇情人。

廣仲以模仿Vitas而走紅,當晚專程演唱〈Loving You〉表演絕技海豚音,中段更突然嚟個Rock ‘N’ Roll版,掀起高潮。而當佢唱到主打歌〈早安,晨之美!〉時,全場大合唱外,佢好頑皮咁將觀眾分成左、右2邊,要大家鬥大聲,話唱得愈大聲,運勢會愈強,連Eason都唱埋一份添!

Encore時,廣仲秀出鋼琴絕活,坦言:「還是有點緊張,這是第2次彈鋼琴,希望可以搏大家歡心,我真的很愛香港!」臨尾亦唱多首新歌〈風雨〉,重同大家許下承諾:「以後遇到風雨時,我的雨傘可以借大家拿,大家一起撐雨傘。」

雖然廣仲個show係11:10pm圓滿結束,但正如佢係投射營幕所寫下「我想要和你們在一起的生活」,佢一定會多啲嚟香港同大家見面。

以上轉自: 香港雜誌新MONDAY網頁
http://www.newmonday.com.hk/index.php?controller=News&action=Index&id=96

沒有留言: